Velipoje

Bunë-Velipojë: Ndotje masive nga mbetjet plastike

Gjatë kësaj jave, në një ekspeditë shkencore në brigjet e Adriatikut, pikërisht rreth peizazhit të mbrojtur ujor/tokësor Lumi Bunë-Velipojë u konstatua një ndotje masive e bregut nga mbetje plastike, mbetje ekologjike, mbetje toksike etj. Lumi Buna dhe territoret Ligatinore përreth tij janë shpallur “Peizazh Ujor/Tokësor i Mbrojtur me VKM nr. 682 të vitit 2005. Aktualisht me ndarjen e re territoriale kjo zonë ka kaluar nën juridiksionin e Bashkisë Shkodër. Ndërsa si kategori zonë e mbrojtur menaxhohet dhe monitorohet nga AdZM-Shkodër (ose përgjegjësi e Agjencisë Kombëtare të Zonave të Mbrojtura).

Mirëmbajtja e plazhit të Velipojës risillet në vëmendje në Ditën Botërore të Mjedisit

Për të promovuar Ditën Botërore të Mjedisit, Qendra Aarhus Shkodër, i është bashkuar nismës së Qendrës së Informimit të Bashkimit Evropian në Shkodër për organizimin e një aktiviteti ndërgjegjësues për ruajtjen dhe mirëmbajtjen e Plazhit të Velipojes. Aktiviteti në ditën e djeshme, e cila përkon edhe me Ditën Botërore të Oqeaneve, kishte për qëllim të thërrasë ndërgjegjen jo vetëm të qytetarëve dhe pushuesve për ruajtjen e kësaj pasurie natyrore por të nxisë edhe përgjegjësitë e institucioneve vendore për një menaxhim sa më efikas të shërbimeve të gjelbra pranë këtij potenciali natyror dhe turistik.

Natyra e paprekur e Vilunit

Udhëtimin në plazhin e Velipojës e vazhdojmë nga skaji më verior i saj, në drejtim të jugut. Kjo është rruga që të çon në plazhin e Vilunit. Pishat dhjetëravjeçare të kujtojnë plazhet shqiptare të viteve të shkuara, kur dora e njeriut nuk kishte ndërhyrë akoma për t’i kthyer në beton. Në zonë gjenden më pak struktura akomoduese dhe restorante. Por freskia dhe qetësia që të ofron pylli e bën mëse të përshtatshme për personat që udhëtojnë me “camper” apo ata që pëlqejnë kampingun me çadra në vend të luksit.

Në lagunën e Vilunit gjendet një breshkë deti e ngordhur

Gjendet një breshkë e ngordhur në Lagunën e Vilunit, në lindje të të plazhit të Velipojës. Breshka e llojit Chelonia mydas është gjetur nga inxhinieri i akuakulturës Besart Halilaj në bregun e detit, në fshatin Rrjoll. Fshati Rrjoll bën pjesë në Njësinë Administrative Velipojë, Bashkia Shkodër, e njëkohësisht në Zonën e Mbrojtur të kategorisë V të IUCN Peisazh Ujor Tokësor i Mbrojtur Lumi Buna-Velipojë, me sipërfaqe 23.027 hektarë. Duke folur për gazetën VIJA, Halilaj tha se breshka me peshë rreth 40 kg, është 90 cm e gjatë dhe 55 cm e gjerë, ndrësa gjatësia e zhguallit është 67 cm. Mendoj se është e moshës mesatare, duke gjykuar nga përmasat dhe pesha, - tha ai.

Plazhi i Velipojës “pushtohet” nga mbeturinat, rrezikohet sezoni turistik

Në prag të sezonit turistik, plazhi i Velipojës ndodhet në një situatë kaotike, i pushtuar nga mbetjet e shumta në brigjet e këtij plazhi. Vetë administratori i Njësisë Administrative Velipojë, Mark Laloshi, pranoi se ka disa prurje të detit, por është duke u punuar për ta pastruar sa më shpejt. Ai tha se po punohet me Bashkinë Shkodër dhe organizatat e biznesit, pasi pastrimi i plazhit nuk është llogaritur me firmën tenderuese nga ish-komuna e Velipojës. Pas deklaratës së Laloshit, shpresohet në një zgjidhje sa më të shpejtë të këtij problemi.

Tabela orientuese për turistët në peizazhin ujor-tokësor lumi Buna-Velipojë

Peizazhi i mbrojtur ujor-tokësor lumi Buna-Velipojë është kthyer në një qëndër për turizmin e natyrës dhe të vëzhgimit. Administrata e Parkut Kombëtar të Shkodrës, duke parë aktivitetin në rritje në fushën e turizmit të kësaj zone, ka filluar edhe investimet për menaxhimin sa më të mirë të saj. Janë ngritur qëndra ku priten vizitorët e huaj dhe vendas, janë përgatitur udhërrëfyes dhe përkthyes të standardeve europiane si dhe janë shtuar guida e fletë-palosjet për vizitorët. Fauna e zonës është ujore dhe gjallon në grykëderdhjen e Bunës.