• Kreu
  • Të tjera
  • Të tjera
  • Nis fushata e 7-të për imunizimin e dhelprave

Nis fushata e 7-të për imunizimin e dhelprave

Për një periudhë dy javore, avionë të vegjël do të shpërndajnë nga ajri vaksinën për imunizimin e dhelprave. Projekti PAZA i mbështetur nga Bashkimi Evropian do të zbatojë një procedurë moderne që garanton vaksinimin e sigurtë dhe në një normë të lartë te dhelprat e kuqe, që janë dhe burimi kryesor i shpërndarjes së tërbimit. Mënyra e vaksinimit është e njejtë me atë që është përdorur që prej pranverës së 2014. Katër avionë të vegjël, të specializuar dhe pajisur me teknologji moderne do të shpërndajnë vaksinat e prodhuara posaçërisht për dhelprën e kuqe.

Shpërndarja e vaksinës do të kryhet nga ajri, ku avionët e vegjël do të hedhin në mënyrë të kontrolluar një lloj vaksine që është e futur në ushqim të posaçëm për dhelprat.

Vaksinat karrem do të shpërndahen përgjatë një periudhë 2 javore në të gjithë territorin e vendit, përjashtuar qendrat urbane dhe sipërfaqet ujore. Avionët e vegjël, nëpërmjet makinerive speciale dhe hartave të sakta shpërndajnë 20 vaksina për kilometër katror dhe gjatë vaksinimit të kësaj vjeshte do të shpërndahen rreth 560 mijë vaksina karrem.

Ky proces bëhet dy herë në vit, në pranverë dhe vjeshtë. Për të arritur një imunizim të plotë të popullatës së dhelprave nga tërbimi është e nevojshme që vaksinime të tilla të bëhen për 5 vjet rresht.

Ky lloj vaksinimi është kryer dhe kryhet me këtë mënyrë në të gjitha vendet e Ballkanit dhe tanimë me mbështetjen e Bashkimit Evropian po kryhet edhe në Shqipëri. Pas disa vitesh vaksinimi të rregullt, tashmë sëmundja është zhdukur në Kroaci, Serbi, vende të rajonit dhe rezultatet tregojnë për ulje të rasteve në thuajse zero dhe në Maqedoni.

E njejta fushatë vaksinimi ndodh dhe në shtetet fqinjë. Pala shqiptare është njoftuar nga fqinjet se, përgjate zonave kufitare do ketë fluturime të ulëta për shkak të vaksinimit kundër dhelprës së kuqe.

Përmes kësaj fushate do të arrihet imunizimi nga tërbimi në të gjithë Ballkanin. Vaksinimi kundër tërbimit bëhet te dhelprat, pasi këto kafshë janë burimi kryesor i kësaj sëmundje me pasoja fatale që transmetohet te qentë dhe te njeriu.

Shërbimi Veterinar Shtetëror do të jetë institucioni shqiptar përgjegjës për mbarëvajtjen e kësaj fushatë shumë të rëndësishme për vendin. Të dhënat nga fushata e vaksinimit të fundit tregojnë se kjo mënyrë ka qenë e suksesshme në Shqipëri. Avionët specialë për shpërndarjen e vaksinës do të operojnë nga aeroporti i Kuçovës.

Print