• Kreu
  • Uji
  • Borxhi i ujësjellësve, 65 milionë euro fatura ndaj OSHEE

Borxhi i ujësjellësve, 65 milionë euro fatura ndaj OSHEE

Sektori publik është përfshirë nga një zinxhir borxhesh të këqija, i cili ka prekur thuajse të gjitha ndërmarrjet shtetërore në nivel qëndror dhe lokal. Pas rrugëve dhe kompanive të energjisë, situata raportohet e rënduar edhe tek ujësjellësit. Të dhënat e fundit zyrtare nga Ministria e Energjisë tregojnë se borxhi i ujësjellësve ndaj Operatorit të Shpërndarjes së Energjisë ka arritur në mbi 65 milionë euro. Situata është rënduar edhe më shumë gjatë këtij viti.

Vetëm për periudhën janar tetor ujësjellësit kanë krijuar 10 milionë euro detyrime të papaguara ndaj OSHEE-së.Sipas ministrisë së Energjisë shumë nga ndërmarrjet e ujësjellësit në vend janë në gjendje të vështirë financiare dhe nuk arrijnë të shlyejnë dot detyrimet financiare, veçanërisht faturën e energjisë.

Qeveria e ka të pamundur të ndërpresë energjinë për ndërmarrjet e ujësjellësave, pasi kjo do të linte pa ujë qytetarët duke krijuar një situatë edhe më të rëndë. Për shkak të gjendjes së rënduar, pak ditë më parë kryeministri Edi Rama njoftoi një aksion të gjerë kundër vjedhjes së ujit.

Të dhënat tregojnë se aktualisht 67 për qind e ujit që prodhohet nga ndërmarrjet e ujësjellësave në rang vendi humbet për shkak të lidhjeve të paligjshme dhe rrjetit të amortizuar. Qeveria u ka dhënë 90 ditë kohë familjarëve që të shkëpusin lidhjet e paligjshme duke paralajmëruar se nga 1 shkurt ata që abuzojnë me ujin do të ndiqen penalisht.

Print