Lajme nga bota


Pandemia do të shënojë fundin e një epoke dhe në modë; ç’do të blejmë e si do të vishemi tani

Sistemi i modës dhe fashionit ndryshoi përgjithmonë më 23 shkurt 2020, kur Giorgio Armani, u bë i stilisti i pare që organizoi sfilatën për linjën vjeshtë-dimër 2021, me dyer të mbyllura. Çdo gjë për shkak të një virusi që kishtë ardhur në Itali, që më pas u pagëzua me emrin corona. Kështu erdhën frika, heshtja, dhimbja, pasiguria, duke marrë jetë njerëzish dhe vende pune.

Megjithatë mbas një stepje fillestare, gjithë bota sikur është mbushur me energji dhe shpresë për të rifilluar.  Në këtë kohë pa kohë, shtëpitë e mëdha të modës dhe brandet, po përjetojnë ndryshimet dhe po përshaten me synime dhe mënyra të reja për të komunikuar me klientët e tyre. Por, çfarë po ndodh realisht në botën e fashionit ? Si do të ndryshojë ajo? Çfarë na pret më pas?

Kemi pyetur Ema Savahl, një emër shumë i njohur në atelietë më lukzose të botës, që ka nisur rrugëtimin e saj në Miami në vitin 1996 një një dyqan rrobash të stilit Vintage të cilin u ofrua ta rikonceptonte. Ajo tashmë është në majat më të larta dhe sapo ka nisur dhe shkollën e saj të modës ENDER.

Si mund të jetë skenari mbas pandemisë?

 Është e vështirë të parashikosh tendencën e modës botërore edhe në qytetin tim ku e gjithë ekonomia varet nga turizmi. Kështu që përgjigjet e mia do të jenë shumë të bazuara në realitetin që unë po zgjedh të jetoj. 

Unë jam shqiptare e rritur në kohë të vështira të komunizmit, kam emigruar në dy vende të ndryshme të botës dhe jam mësuar ta filloj çdo gjë nga e para dhe të jem e gëzuar dhe jo e frikësuar. Në këtë moment e ndiej që kam rolin e një personi që jep kurajo dhe një vizion për një të ardhme më të bukur. Më kanë ftuar në intervista në kanale televizive lokale dhe jam duke kuptuar që detyra ime në këtë moment është ta përdor kreativitetin tim për të zhdramatizuar situatën dhe të udhëheq në një drejtim me shpresa dhe ngacmim për të ardhmen.

Shumë nga ne angazhohen për një të ardhme më të mirë dhe kanë mundësinë ta jetojmë këtë të ardhme. Unë e ndiej si detyrë të jem një udhëheqëse e tillë në qytetin tim, për vendin tim dhe kudo ku influenca ime arrin. Dua të marr këtë moment për të falenderuar Living Magazine që gjithmonë më ka kontaktuar në momentin tim më krijues e më të frutshëm.

Si do ndryshojë konsumi ynë?

Unë mendoj që ne të gjithë e kemi marrë mesazhin global, që jemi të gjithë në të njëjtën varkë. Kemi marrë mesazhin që mentaliteti i konsumit, stresi, mungesa e respektit për planetin tonë nuk mund të vazhdojnë më. Kemi kuptuar që ekonomia e konkurrencës nuk funksionon për mirëqënien tonë trupore, mendore dhe shpirtërore.

Kemi kuptuar që udhëheqja jonë ( globale) nuk po na drejton për mirëqënien e njerëzimit. Që udhëheqja është e verbuar me përfitimin dhe ka humbur pusin e jetës. Kemi kuptuar që është në dorën tonë, në dorën e 99% të popullatës që të votojmë nëpërmjet zgjedhjes së prodhimeve që blejmë duke respektuar jetën dhe njerëzit në gjithë botën.

Unë shpresoj që ne, njerëzit në mënyrë lokale, të sponsorizojmë kompanitë e vogla duke konsumuar prodhimet e tyre. Ku veshjet janë krijuar me dashuri dhe përkujdesje e jo të prodhuara masivisht në vende kur nuk respektojnë kujdesin për planetin tonë.

Çfarë mund të ndodhë në eventet e modës, sfilata, panaire?

Mendoj që eventet dhe sfilatat do të vazhdojnë, por pak e nga pak do të jenë shumë më tepër të drejtuara në botën digjitale. Mendoj që ky moment në historinë e njerëzimit i jep fund erës industriale duke i hapur rrugën  erës së  informacionit (informatikës).

Shpesh herë është folur për një mbingarkesë të botës fashion, mendon që do ketë nje seleksionim të brandeve?

 Po pa diskutim, njerëzit do të jenë shumë më selektiv ndaj produketeve që po blejnë. Historia mbas çdo veshje, prejardhja, mesazhi, do jenë shumë më të rëndësishëm sesa emri i markës. Mbështetja ndaj artistëve lokal do të jetë një shenjë zgjimi. Trend do të jetë zgjedhja e ndërgjegjshme e prodhimeve.  

A do ketë ndryshime në atë që pelqejmë?

 Po  veshja jonë do të marrë formën e mesazhit personal. Veshja do të bëhet një formë e vetëshprehjes personale. Veshja do të bëhet simbolizuese. Mënyra se si do të blejmë do të ndryshojë. Shumica e prodhimeve do të blihen online.

Moda do jetë frenetike siç ka qenë deri tani?

 Në realitetin që unë kam zgjedhur asgjë nuk do të jetë më aq frenetike dhe stresuese sa më parë. Ne do të marrim kohën të shohim njëri-tjetirn në sy dhe do të kemi biseda të rëndësishme për mbijetimin dhe zhvillimin e njerëzimit të ri.  Shprehja BC ( before Corona) AC (after Corona) do ndajë të kaluarën dhe botën e re qe ne po hyjmë.

Çfarë mund të ndodhë me stilistin lokal?

 Shumë dizenjatorë të ri do të hapin punishte të vogla e dyqane. Unë personalisht po kthej gjysmën e punishtës në një inkubator ku do të mësoj dhe do të udhëheq stilistët e rinj të së ardhmes. Do ti mësoj si të krijojnë duke shprehur dhuratën që ato kanë ardhur të japin në këtë botë ( ashtu siç bëra unë); e jo të ndjekin trende të drejtuara nga kompanitë e mëdha me planet e tyre të kompromentuara. Shkolla në përgjithësi do të ndryshojë. Shkolla im e modës quhet ENDER ( Enderschool) që përmbledh ENDER dhe NDER ( ndero ëndrrën tënde). Unë ndiej që gjithë jeta ime më ka përgatitur për këtë moment. E kisha ndjerë që ky moment do vinte. E kisha përgatitur kurrikulumin e shkollës muaj më parë.   

A do ketë nje vetëdijesim të brendeve dhe përsa i përket ndryshimeve klimaterike?

Sigurisht, një vlerësim shumë i madh ndaj planetit tonë do të jetë një sjellje e re. Ne e pamë sa bukur natyra vadhdon edhe pa ne. Ne pamë me respeket e reverencë se si nëna tokë jep jetë pa kërkuar asgjë në këmbim. Ne e pamë që jeta vazhdoi bukur. Unë mendoj që ky mësim do të jetë i shkruar në ADN-në tonë përgjithmonë.

Mbas nje krize botërore si kjo, ka arsye të ekzistojë ende moda? 

Po edhe më shumë se më parë, moda do të jetë e rëndësishme, por do të ndryshojë shumë energjinë dhe vibracionin që veshja ofron.

Cilësi mbi Sasi!

Veshjet do të bëhen të rëndësishme, simbolizuese, shprehëse, do të jenë të mbushura me energjinë e vendlindjes, me energjine e krijuesit. Veshjet do të bëhen të shenjta e me të vlerësueshme se kurrë.

Veshja do të bëhet një formë arti e shprehur në lëvizje.

Gjithashtu mendoj që ndërkohë që Mediet Sociale zhvillohen, do të rritet dhe moda digjitale e njerëzit do të blejnë veshje për avatarët e tyre. E shprehura e vetes do të jetë trendi i së ardhmes.

Qëndroni më të informuar për mjedisin

Regjistrohuni për të marrë përmbledhjen ditore të lajmeve mjedisore në e-mailin tuaj.