Zjarret masive “gjunjëzojnë” Spanjën

Botuar nga Tv Klan me 14 Sep, 2021.

Shtëllunga të mëdha tymi kanë mbuluar malet duke ua vështirësuar punën zjarrfikësve që përpiqen të frenojnë flakët në terrenin e thatë dhe të pyllëzuar.

Është shënuar viktima e parë nga zjarret të cilat kanë përfshirë Spanjën. Viktima është një zjarrfikës 44-vjeçar i cili ka humbur jetën në përpjekje për të shuar zjarrin  i cili ka rënë pranë qytetit turistik të Estepona.

Teksa situata vijon të jetë tepër kritike autoritet lokale kanë bërë të mundur evakuimin e më shumë se  900 banorëve nga qytetet dhe fshatrat Jubrique, Farajan, Pujerra, Alpandeire dhe Juzcar në kodrat e përfshirë nga zjarret.

Sipas të dhënave zyrtare nga ministria e Mjedisit zjarri ka shkrumbuar më shumë se 6,000 hektarë.

Agjencia rajonale e zjarreve pyjore e Andaluzisë tha se 365 zjarrfikës janë në betejë me flakët, të ndihmuar  nga 41 avionë dhe 25 automjete. Autoritet spanjolle bëjnë me dije se zjarri është vënë qëllimisht  dhe hetuesit po punojnë  për të zbuluar më shumë detaje.

Për shkak të kushteve të vështira të terrenit dhe erës së fortë kjo e ka ndërlikuar më shumë punën e zjarrfikësve.

Zjarret shkatërruese kanë përfshirë  disa shtete të botës këtë vit, të nxitura  nga kushtet atmosferike, për të cilat ekspertët thonë se këto janë pasojat e ndryshimit të klimës.